Poet
chahaton ki jo dil ko aadat hai
ye bhi insan ki ik zarurat hai
ham farishte kahan se ban jaa.en
ishq insan ki jibillat hai
kaun aaya hai kaun aa.ega
be-sabab jagne ki aadat hai
kya milenge jo kho ga.e ik baar
bhiiḌ men DhunDhna qayamat hai
un ke andaz dushmani men bhi
dosti ki ajab shabahat hai
mere andar jo mera dushman hai
hu-ba-hu vo miri hi surat hai
un ke va.adon se ye hua ma.alum
jhuuT sab se baḌi sadaqat hai
is qadar duur kyuun nikal aa.e
ab to ghar lauTna qayamat hai
un ke lahje men un ki baton men
chandni-rat ki sabahat hai
ye kahani bhi ḳhuub hai yaaro
har jagah ek si ibarat hai
‘vajd’ yadon men un ki gham rahna
rahaton ki hazar rahat hai
kis liye ‘vajd’ dil-girafta ho
dushmani doston ki aadat hai
Leave a Reply