dekhne us ko koi mere siva kyuun aa.e
mere hamrah ye naqsh-e-kaf-e-pa kyuun aa.e
kal thi ye fikr use haal suna.en kaise
aaj ye sochte hain us ko suna kyuun aa.e
kam nahin hai ye aziyyat ki abhi zinda huun
ab mire sar pe koi aur bala kyuun aa.e
main bulandi pe agar ja.un to kaise ja.un
asmanon se zaminon pe ḳhuda kyuun aa.e
adl-o-insaf taqaza-e-mashiyyat hi sahi
zindagi hi men magar roz-e-jaza kyuun aa.e
dauḌte ḳhuun ki ik lahar bahut kaafi hai
shafaq-e-sham ko itni bhi haya kyuun aa.e
qaidiyon ke liye behtar hai ki ghuT kar mar jaa.en
raushni jab nahin aati to hava kyuun aa.e
log ḳhamoshi ka karte hain taqaza ya.ani
saans lene ki bhi ‘shahzad’ sada kyuun aa.e
Leave a Reply