chheḌ ke saz-e-zargari ḳhalq-e-ḳhuda hai raqs men
yuun ki tamam shahr hi Duub chala hai raqs men
ye jo nasha hai raqs ka ik miri zaat tak nahin
kuza-ba-kuza gil-ba-gil saath ḳhuda hai raqs men
koi kisi se kya kahe koi kisi ki kyuun sune!
sab ki nazar hai taal par sab ki ana hai raqs men
husn ki apni ik numu ishq ki apni hao-hu
ek hava hai rang men ek hava hai raqs men
kaun ye kah ke chal diya ho tiri bastiyon ki ḳhair
aaj hava bhi tez hai aur diya hai raqs men
koi savad-e-vaqt par koi surud-e-zat tak
paanv hai sab ka ek sa phir bhi juda hai raqs men
burj-e-shahi se dekhna aise fishar-e-vaqt men
ḳhak-ba-sar ghazal-ba-lab kaun gada hai raqs men
Leave a Reply