duniya se dagh-e-zulf-e-siyah-fam le gaya
main gor men charagh-e-sar-e-sham le gaya
ki tark main ne shaikh o barahman ki pairvi
dair-o-haram men mujh ko tira naam le gaya
dozakh men jal gaya kabhi jannat men khush raha
mar kar bhi saath gardish-e-ayyam le gaya
main justuju-e-kufr men pahuncha khuda ke paas
kaaba tak in buton ka mujhe naam le gaya
pahna kafan to kucha-e-qatil men paai raah
kaaba men mujh ko jama-e-ehram le gaya
nafrat hui do-rangi-e-lail-o-nahar se
main subh o shaam us ko lab-e-bam le gaya
kuchh lutf ishq ka na mila jite-ji ‘munir’
nahaq ka ranj muft ka ilzam le gaya
Leave a Reply