tera andaz-e-suḳhan sab se juda lagta hai
barbat-e-dil pe koi naghma-sara lagta hai
vo diya jis se ki raushan ho charagh-e-hasti
ghaur se dekhen havaon men ghira lagta hai
ham hain aghosh-e-junun men to ta.ajjub kaisa
vo bhi to dushman-e-arbab-e-vafa lagta hai
gar nahin jalvagari bazm-e-tarab men phir bhi
teri ḳhushbu se vahan tera pata lagta hai
donon hathon se chhupana tire chehre ka mujhe
sochta huun to tira dast-e-dua lagta hai
jis ka milna bhi qayamat se nahin kam ‘javed’
is ka milna bhi mujhe roz-e-jaza lagta hai
Leave a Reply