Saleem Shahid
tarz-e-iz.har men koi to naya-pan hota
dard rangin badan shishe ka bartan hota
kis liye roz badalta huun main malbus naya
aisa kachcha to na us naqsh ka roghan hota
pair kamre se nikale to main bazar men tha
hai ye hasrat ki mire ghar ka bhi angan hota
aanch mil jaati jo kuchh aur to jauhar khulte
tum jise raakh samajhte ho vo kundan hota
kuchh zamin ki hai ye tasir ki chehre hain hasin
shahr gar shahr na hota koi gulshan hota
main bhaTakta na kabhi raat ki tariki men
aise sunsan men ghar tha to vo raushan hota
Leave a Reply