Saleem Ahmed
tark un se rasm-o-rah-e-mulaqat ho ga.i
yuun mil ga.e kahin to koi baat ho ga.i
dil tha udaas alam-e-ghurbat ki shaam thi
kya vaqt tha ki tum se mulaqat ho ga.i
ye dasht-e-haul-ḳhez ye manzil ki dhun ye shauq
ye bhi ḳhabar nahin ki kahan raat ho ga.i
rasm-e-jahan na chhuT saki tark-e-ishq se
jab mil ga.e to pursish-e-halat ho ga.i
ḳhu bu rahi sahi thi jo mujh men ḳhulus ki
ab vo bhi nazr-e-rasm-e-inayat ho ga.i
dilchasp hai ‘salim’ hikayat tiri magar
ab so bhi ja ki yaar bahut raat ho ga.i
Leave a Reply