tark khvahish-e-zar kar kimiya-gari ye hai
dil men rakh khayal-e-dost shisha-o-pari ye hai
dekh ho gai nargis baagh men tujhe hairan
shokh-chashm jadugar teri sahiri ye hai
zulf teri afsun-gar chashm teri pur-jadu
vo hai sehr-e-bangala sehr-e-samri ye hai
mere aah bharne par shab ko tu jo hansta hai
vo ajab havai hai zor-e-phuljhadi ye hai
saal tab the pal jaise aan ab qaran si hai
vasl ke baras vo the hijr ki ghadi ye hai
mah-ru ke kanon men goshvare rakhshan hain
dekh ‘ishq’ vo zohra aur mushtari ye hai
Leave a Reply