Sau Qisson Se Behtar Hai Kahani Mere Dil Ki

sau qisson se behtar hai kahani mire dil ki

sun us ko tu ai jaan zabani mire dil ki

har naale men yaan tukde jigar hota hai bulbul

asan nahin tarz udani mire dil ki

honi hai shahid ek na ik roz tamanna

mauquf ho kya marsiya-khvani mire dil ki

piiri men bhi milta hai jo kam-sin koi mahbub

karti hai vahin uud javani mire dil ki

taqsim kiye para-e-dil bazm-e-butan men

har ek ke hai paas nishani mire dil ki

ik baat men ho jaae musakhkhar vo pari-ru

sunta hi nahin sehr-bayani mire dil ki

hai abr to kya chahe falak ko bhi jala de

bijli men kahan shola-fishani mire dil ki

zulfon men kiya qaid na abru se kiya qatl

tu ne to koi baat na maani mire dil ki

ye bar-e-gham-e-ishq samaya hai ki ‘nasikh’

hai koh se dah-chand girani mire dil ki

Leave a Comment