tanha.iyon men shor-e-qayamat bapa hai ḳhair
kis ki kami hai yaad nahin aa raha hai ḳhair
lazim hai ham ko dekhna jo kuchh falak dikha.e
ik bevafa ke honTon pe lafz-e-vafa hai ḳhair
tujh se bichhaḌ ke ziist ka imkan hi nahin
tu chhoḌ jan-e-jan ye mira mas.ala hai ḳhair
ḳhun-e-jigar ne surḳh kiya dast-e-naz ko
un ko ye lag raha hai ki rang-e-hina hai ḳhair
vo a.ine ko dekhte hain a.ina unhen
ik a.ine ke samne ik a.ina hai ḳhair
tujh ko to ḳhuub ḳhuub hai mere dukhon ka ilm
tu to miri hayat men shamil raha hai ḳhair
‘nasir’ kamal-e-sher men da.ava nahin magar
jo kuchh tha mere dil men vo sab kah diya hai ḳhair
Leave a Reply