Khwaja Shauq
chaak dil men hai salamat hai gareban mera
kaun samjhega ilahi gham-e-pinhan mera
pahle ye tha ki gham un ka dil-e-viran mera
ab main apna huun na dil hai kisi unvan mera
tang daman huun magar daman-e-dil tang nahin
hai miri hausla-mandi sar-o-saman mera
aaj zarrat-e-chaman bhi nahin vaqif mujh se
tha kabhi naam gulistan-ba-gulistan mera
har nafas naghma-e-be-tabi-e-gham jaari hai
chheḌe jaata hai koi saz-e-rag-e-jan mera
ruḳhsat ai sohbat-e-mai-ḳhana phir aa ja.unga
rasta dekhti hai gardish-e-dauran mera
qaid huun apne ḳhayalat ki zanjiron men
ban gaya hai mira ehsas hi zindan mera
apni be-nam adaon ko bacha.e rakhiye
ye na ban jaa.en kahin hal-e-pareshan mera
dil ki dushvar-pasandi ko dua deta huun
kaam mushkil se hua karta hai asan mera
mere afkar ki ḳhushbu hai ka.i phulon men
har gulistan nazar aata hai gulistan mera
pas-e-adab-e-mohabbat mujhe ‘shauq’ itna hai
chaak hone nahin paata hai gareban mera
Leave a Reply