tanab-e-zat kisi haath men jami hui hai
ki jaise vaqt ki dhaḌkan yahin ruki hui hai
tujhe rava nahin paigham vasl ke bhejen
lakir hijr ki jab haath par bani hui hai
har ik daraḌ badan ki numayan ho ga.i hai
kahani dard ki divar par likhi hui hai
yunhi to ḳhvab hamen dasht ke nahin aate
hamari aankh kahin ret men dabi hui hai
vo mere saath kisi da.ere men chal raha hai
ghaḌi ki tisri suui magar thami hui hai
vo shaḳhs faisla kar ke gaya nahin ta-hal
ki aane vaali qayamat abhi Tali hui hai
vo aa.ine men magan kuchh bhi dekhta nahin hai
main kya bata.un miri jaan par bani hui hai
badan men ishq bhi halkore le raha hai ‘zubair’
hamare samne rassi koi tani hui hai
Leave a Reply