tamannāoñ meñ uljhe rah ga.e haiñ
hamāre bachche būḌhe rah ga.e haiñ
vo āñkheñ kitnā aage jā chukī haiñ
samundar kitnā pīchhe rah ga.e haiñ
abhī tanhā vo guzrī hai yahāñ se
hazāroñ dil dhaḌakte rah ga.e haiñ
jinheñ bāñhoñ meñ bhar kar so rahī ho
bahut achchhe vo takiye rah ga.e haiñ
ba-zāhir ik nayā-pan aa chukā hai
magar ye dil purāne rah ga.e haiñ
ye kis ne ḳhvāb se aa kar jagāyā
ham us ko chhūte chhūte rah ga.e haiñ
kisī ko baaġh hāsil ho chuke haiñ
kahīñ añgūr khaTTe rah ga.e haiñ