tamanna thi jo ankhon men vahi lahje men rakh dena
main aa.uun to ummidon ka diya raste men rakh dena
sameToge kabhi chadar jo tum umr-e-gurezan ki
bas ik ḳhushbu bhara lahja mire hisse men rakh dena
sambhala hai jise dil ke nihan-ḳhanon men barson se
mohabbat ka vahi sikka mire kaase men rakh dena
chalo milte hain janmon ke kahin us paar taron men
vahan ik da.imi lamha mire mathe pe rakh dena
mohabbat ki hasin vaadi men tum Thahre na ham Thahre
ab in nargis ke phulon ko kahin raste men rakh dena
nahin likhna koi qissa miri nakam hasrat ka
bas ik TuuTa hua taara mire katbe men rakh dena
baha dena sabhi yaden kahin ja kar samundar men
nadamat ka bas ik moti kisi sajde men rakh dena
Leave a Reply