Anwar Anjum
chup baiTha main kya kya sochta rahta huun
aḳhir main kyuun itna tanha tanha huun
pahron jin ki jhiil men khoya rahta huun
un ankhon ki yaad men Duuba rahta huun
tum jo baten bhuul chuke ho muddat se
main to un men ab bhi uljha rahta huun
tum badlo to badlo apni raah magar
main to ek Dagar par chalta rahta huun
sada-pan kuchh neki hi ka naam nahin
dekhne men to main bhi sidha-sada huun
tere ghar bhi pahuncha hai ye shor kabhi
ya main hi anjan sada.en sunta huun
ghar ki divaron men yuun dil-tang na ho
DhunD mujhe main is ghar ka darvaza huun
kya kahiye ye kaise zamin hamvar hui
is sahra men kaise paani laaya huun
jis ne pyaar se dekha us ke saath hua
sach puchho to main bhi ab tak bachcha huun
‘anjum’ main kyuun duniya par ilzam rakhun
ankhen hain to phir kyuun Thokar khata huun
Leave a Reply