tamam umr ho na paa.i vo nazar apni
rah-e-hayat men banti jo ham-safar apni
hazar sang-e-garan zindagi ki raah men the
na jaane kaise jahan men hui basar apni
zamin pe zabt-e-fughan sa.i-e-ra.egan Thahra
falak pe ja ke hui aah be-asar apni
kisi risale men shaa.e ho jaise koi ghazal
kuchh is tarah se hui baat mushtahar apni
mujhe shikayat-e-aghyar se gharaz kyon ho
hansi uḌaa.i hai yaron ne ḳhaas kar apni
vo kya kisi ko mulaqat ka sharaf dega
jo ḳhairiyat bhi na likh paa.e do satar apni
mila na chain tiri justuju men saara din
lagi na aankh tire gham men raat bhar apni
suragh-e-manzil-e-irfan na mil sakega kabhi
ghalat-ravi se hazimat hai sar-basar apni
gulon ka ḳhuun tha rang-e-bahar ke pichhe
fareb kha na saki chashm-e-mo’atabar apni
hava-e-shauq ke pichhe ghubar ban ke uḌi
bisat bhuul ga.i hasti-e-bashar apni
main inkishaf karun bhi to kis tarah se ‘saba’
tavil raaz hai aur umr muḳhtasar apni
Leave a Reply