Tu Hi Hai Meri Ye Bud-O-Baqa Tu Aur Nahin Main Aur Nahin

tū hī hai mirī ye būd-o-baqā tū aur nahīñ maiñ aur nahīñ

dekhā jo apne ko tū hī milā tū aur nahīñ maiñ aur nahīñ

tū hī adam kā thā parda-nashīñ mire dil ke makāñ kā hai tū hī makīñ

mirī hastī hai sab ye zuhūr tirā tū aur nahīñ maiñ aur nahīñ

mire hosh-rubā ne hai fazl kiyā mujhe rāz-e-ḳhudā.ī apnā diyā

mirī ruuh meñ ruuh milā ke kahā tū aur nahīñ maiñ aur nahīñ

kahtā hai ye mujh se merā sanam ki haiñ ek hī ye donoñ hudūs-o-qidam

kuchh farq nahīñ is meñ hai zarā tū aur nahīñ maiñ aur nahīñ

‘mardān-safī’ mirā māh-e-laqā hai merī hī shakl meñ jalva-numā

mujh se ye kahtā hai kah de khulā tū aur nahīñ maiñ aur nahīñ

Leave a Comment