tu hi hai miri ye bud-o-baqa tu aur nahin main aur nahin
dekha jo apne ko tu hi mila tu aur nahin main aur nahin
tu hi adam ka tha parda-nashin mire dil ke makan ka hai tu hi makin
miri hasti hai sab ye zuhur tira tu aur nahin main aur nahin
mire hosh-ruba ne hai fazl kiya mujhe raz-e-ḳhuda.i apna diya
miri ruuh men ruuh mila ke kaha tu aur nahin main aur nahin
kahta hai ye mujh se mera sanam ki hain ek hi ye donon hudus-o-qidam
kuchh farq nahin is men hai zara tu aur nahin main aur nahin
‘mardan-safi’ mira mah-e-laqa hai meri hi shakl men jalva-numa
mujh se ye kahta hai kah de khula tu aur nahin main aur nahin
Leave a Reply