Tamam Rang Jahan Iltija Ke Rakkhe The

Zafar Moradabadi

tamam rang jahan iltija ke rakkhe the

lahu lahu vahin manzar ana ke rakkhe the

karam ke saath sitam bhi bala ke rakkhe the

har ek phuul ne kanTe chhupa ke rakkhe the

sukun chehre pe har ḳhush ada ke rakkhe the

samundaron ne bhi tevar chhupa ke rakkhe the

miri ummid ka suraj ki teri aas ka chand

diye tamam hi ruḳh par hava ke rakkhe the

vo jis ki paak uḌanon ke mo’tarif the sab

jale hue vahi shahpar haya ke rakkhe the

bana yazid zamana jo main husain bana

ki zulm baaqi abhi karbala ke rakkhe the

unhin ko toḌ gaya hai ḳhulus ka chehra

jo chand aa.ine ham ne bacha ke rakkhe the

yunhi kisi ki koi bandagi nahin karta

buton ke chehron pe tevar ḳhuda ke rakkhe the

ga.e hain bab-e-rasa tak vo dastaken ban kar

‘zafar’ jo haath pe aansu dua ke rakkhe the