Noor Bijnauri
tamam raat hava chiḳhti rahi ban men
tamam raat uḌi ḳhaak dil ke angan men
hai aql zahr junun zahr-e-aql ka tiryak
ye raaz khul hi gaya ham pe bavle-pan men
ye jugnuon ki chitaen ye sogvar faza
sulag uThe hain sharare nazar ke daman men
sahar hui to bagulon ka raqs dekhenge
ḳhizan ne ham ko bulaya hai sehn-e-gulshan men
main us se bhaag ke ja.un bhi to kahan ja.un
chhupa hua hai koi roz-o-shab ki chilman men
uTha.un taisha-e-farhad be-sutun kaTun
ye aarzu to javan thi mire laḌakpan men
main dil ki aag ko ghazlon ka ruup deta huun
nahin harif kisi ka main sher ke fan men
Leave a Reply