rakkho ḳhidmat men mujh se kaam to lo
baat karte nahin salam to lo
mai piyo tum surur ho mujh ko
haath se mere ek jaam to lo
baat tum ne nahin ki ghair se kal
sar pe allah ka kalam to lo
banda hota huun aap ka be-dam
hove darkar agar ghulam to lo
naz-o-andaz husn-o-ḳhubi men
kaun hai tum sa us ka naam to lo
aap farma.en jo baja la.un
kabhi mujh se bhi koi kaam to lo
munh se aane lagegi itr ki bu
nam-e-gesu-e-mushk-e-fam to lo
pahle kar lo rasa.i zulf talak
silsile ko junun ke thaam to lo
phir taḌap lijiyo giraftaro
dam bhar aram zer-e-dam to lo
mai piyo jo nahin pilate ho
mujh ko dete nahin ho jaam to lo
naz-bardar dusra mujh sa
kaun ashiq hai us ka naam to lo
‘rind’ hazir hain shisha-o-saghar
mai na samjho agar haram to lo
Leave a Reply