tama.a ka daur hai hatim ata kar
najaf ke shaah sa hakim ata kar
zamin par ghasibon ki hai hukumat
zamin ko musi-e-‘kazim’ ata kar
tiri dharti pe tera adl chahen
nizam-e-adl ka nazim ata kar
jo bhukon ko khila.e narm roTi
hamen maula vahi hashim ata kar
mile sha.ir ko raz-e-kun-fakuni
ali ke ilm ka raqim ata kar
jo kaaTe marhab-o-antar ke sar ko
usi karrar sa jasim ata kar
tujhe ḳhush aa.e teri la-makani
mujhe mera pata lazim ata kar
har ik nau-shah ko ‘naqqash’ ke rab
shu.ur-e-hazrat-e-‘qasim’ ata kar
Leave a Reply