Tama Ka Daur Hai Hatim Ata Kar

tama.a kā daur hai hātim atā kar

najaf ke shaah sā hākim atā kar

zamīñ par ġhāsiboñ kī hai hukūmat

zamīñ ko mūsī-e-‘kāzim’ atā kar

tirī dhartī pe terā adl chāheñ

nizām-e-adl kā nāzim atā kar

jo bhūkoñ ko khilā.e narm roTī

hameñ maulā vahī hāshim atā kar

mile shā.ir ko rāz-e-kun-fakūnī

alī ke ilm kā rāqim atā kar

jo kaaTe marhab-o-antar ke sar ko

usī karrār sā jāsim atā kar

tujhe ḳhush aa.e terī lā-makānī

mujhe merā patā lāzim atā kar

har ik nau-shāh ko ‘naqqāsh’ ke rab

shu.ūr-e-hazrat-e-‘qāsim’ atā kar

Leave a Comment