talash main ne zindagi men teri be-shumar ki
jo tu nahin mila to tujh si shakl iḳhtiyar ki
taqaza karne maut aa.i tab mujhe pata laga
abhi talak main le raha tha saans bhi udhar ki
thi sard yaad ki hava main dasht men tha maazi ke
na puchhiye janab main ne kaise raat paar ki
tamam shab guzar ga.i bas ek is umiid men
palaT ke aa.egi sada kabhi to is pukar ki
ThiThur rahe hain kyuun bhala ḳhuda ke hi to ham bhi hain
chalo uTha ke oḌh len vo chadaren mazar ki
jala diin main ne zehn ki kitaben saari is liye
ki dastan thi sabhi men us ke intizar ki
bikherti hai shab mujhe sameT leti hai sahar
main chahta huun ḳhatm ho ye jang baar baar ki
mujhe ghurur toḌna tha mauj ka isi liye
utar paḌa main naav se badan se naddi paar ki
Leave a Reply