Amjad Husain Hafiz Karnataki
miri vafa ki vo pahchan bhi nahin rakhte
sila to duur hai ehsan bhi nahin rakhte
vo barkaton ke farishton ke intizar men hain
gharon men apne jo qur.an bhi nahin rakhte
jinhen ḳhulus ki ḳhushbu aziiz hoti hai
vo apni mez pe gul-dan bhi nahin rakhte
vo hadson se Darate hain apne bachchon ko
diyon ke samne tufan bhi nahin rakhte
baḌe ajiib musafir hain ham bhi ai ‘hafiz’
safar pe nikle hain saman bhi nahin rakhte
Leave a Reply