Muneer Saifi
talab se bhi kuchh aur ziyada mila
badan par ghamon ka labada mila
mujhe har jagah sarfarazi mili
ki gham ka mujhe shahzada mila
bahut sadgi us ke bachpan men thi
javani ka qissa bhi saada mila
ki be-saz-o-saman tha is liye
mujhe har safar be-irada mila
zamin par tu sau asman oḌh le
makan tujh ko kitna kushada mila
rag-e-sang jab bhi nichoḌi ga.i
gulon ka lahu taaza taaza mila
hansi ko taraste hue lab mile
har ik shakl par gham ka ghaza mila
Leave a Reply