Nawaz Asimi
tah-e-mazar kaun hai sar-e-mazar kaun tha
jo qabr giili kar gaya vo ashk-bar kaun tha
sabhi ne ashkar apne aap ko kiya magar
numa.ishon ki aaḌ men vo parda-dar kaun tha
tamam shahr gharq hai ghubar hi ghubar men
amir-e-shahr ye bata vo ḳhaksar kaun tha
vo qaum hi ajiib thi the nim-barahna sabhi
nadamaten thiin kis ke paas sharmsar kaun tha
musafiron ka kya hua ai naḳhuda tu hi bata
bhanvar ki zad men kaun tha nadi ke paar kaun tha
thi be-haya.iyon ki dhuum shahr-e-imtiyaz men
bigaḌ chuke samaj ka javab-dar kaun tha
miri qaza ke ba.ad shor-o-ghul tha azhdaham men
mudava gham ka kar gaya vo gham-gusar kaun tha
jhalak rahi hain azmaten ‘navaz’ us ke taaj men
jo taaj us ko de gaya vo tajdar kaun tha
Leave a Reply