Basir Sultan Kazmi
har-chand mere haal se vo be-ḳhabar nahin
lekin vo be-kali jo idhar hai udhar nahin
avaz-e-raftagan mujhe laati hai is taraf
ye rasta agarche miri rahguzar nahin
chamki thi ek barq si phulon ke as-pas
phir kya hua chaman men mujhe kuchh ḳhabar nahin
kuchh aur ho na ho chalo apna hi dil jale
itna bhi apni aah men lekin asar nahin
aati nahin hai in se shanasa.i ki mahak
ye mere apne shahr ke divar-o-dar nahin
‘basir’ jaga diya hai tumhen kis ne aadhi raat
is dasht men to nam-o-nishan-e-sahar nahin
Leave a Reply