Tabligh-E-Payam Ho Gai Hai

Ismail Merathi

tabligh-e-payam ho gai hai

hujjat bhi tamam ho gai hai

jab mauj-e-saba udhar se aai

tafrih-e-masham ho gai hai

kitni bodi hai tab-e-insan

aadat ki ghulam ho gai hai

khvahish ki thi aadmi ko lazim

badh kar ilzam ho gai hai

tamhid-e-payam hi men apni

taqrir tamam ho gai hai

bachna ki vaba-e-sohbat-e-bad

is daur men aam ho gai hai

halqe men qalandaron ke aa kar

tahqiq tamam ho gai hai

jarga men loqandaron ke ja kar

hikmat badnam ho gai hai

shirin-dahanon ki tarz-e-guftar

maqbul-e-anam ho gai hai

beja bhi nikal gai hai jo baat

tahsin-e-kalam ho gai hai

namard ke haath men pahunch kar

shamshir niyam ho gai hai

takfir-e-biradaran-e-din bhi

shart-e-islam ho gai hai

kya sher kahen ki shaeri ki

turki hi tamam ho gai hai