lafz ki ka.enat men gum huun
fikr men gum huun baat men gum huun
tum ho kho.e hue zamane men
main ḳhud apni hi zaat men gum huun
kya ajab tha jo maut aa jaati
gham to ye hai hayat men gum huun
fat.h ke jashn men hain sab sarshar
main to apni hi maat men gum huun
tum ne jin mushkilon men chhoḌa tha
main unhin mushkilat men gum huun
zahr khana mujhe nahin aata
qand men aur nabat men gum huun
koi aa.e na dekhne mujh ko
main ajab ka.enat men gum huun
main huun ‘mamun’ ik ajab insan
ka.enat aur zaat men gum huun
Leave a Reply