Tab Nahin Sukun Nahin Dil Nahin Ab Jigar Nahin

Nooh Narvi

taab nahin sukun nahin dil nahin ab jigar nahin

apni nazar kidhar uThe koi idhar udhar nahin

roz shab uThte baiThte un ki zaban par nahin

koi nahin ki had nahin shaam nahin sahar nahin

koi yahan se chal diya raunaq-e-bam-o-dar nahin

dekh raha huun ghar ko main ghar hai magar vo ghar nahin

itni ḳhabar to hai zarur le ga.e dil vo chhin kar

kya hua us ka phir ma.aal is ki mujhe ḳhabar nahin

kyuun vo idhar udhar phire kyuun ye hudud men rahe

teri nazar to hai nazar meri nazar nazar nahin

mujh se bigaḌ kar apne ghar ja.iye ḳhair ja.iye

aap ne ye samajh liya aah men kuchh asar nahin

dair ko ham ghaTa.en kyuun kaabe ko ham baḌha.en kyuun

kya hai ḳhuda ka ghar yahi kya vo ḳhuda ka ghar nahin

parde se bahar aa.iye ruḳh se naqab uTha.iye

tab-e-jamal la sake itni miri nazar nahin

mujh ko ḳhayal-e-roz-o-shab ḳhaak rahe mazar men

aisi jagah huun jis jagah shaam nahin sahar nahin

tegh kaho sinan kaho qahr kaho bala kaho

ahl-e-nazar ki raa.e men un ki nazar nazar nahin

Dar ga.e ahl-e-ajnuman tiir jo aap ka chala

is ne kaha idhar nahin us ne kaha udhar nahin

roz ke gham ne is tarah ḳhugar-e-zabt-e-gham kiya

dard hamare dil men hai shikva zaban par nahin

puchhte hain vo hal-e-dil tul-e-suḳhan se fa.eda

sau ki ye ek baat hai kah duun mujhe ḳhabar nahin

un men kuchh aur baat thi in men kuchh aur baat hai

hazrat-e-‘nuh’ ka guman hazrat-e-nuh par nahin