surat-e-barq-e-tapan sho.ala-fagan uTThe hain
azm-e-nau le ke javanan-e-vatan uTThe hain
hifz-e-namus-e-mohabbat ke liye divane
apne dil men liye marne ki lagan uTThe hain
ruḳh zamane ki havaon ka badalne vaale
aaj Daale hue mathe pe shikan uTThe hain
paikar-e-mehr-o-vafa ham hain magar majburan
haath men tegh liye ghalghala-zan uTThe hain
aanch namus-e-vatan par nahin aane denge
ab to ham bandhe hue sar se kafan uTThe hain
chand lamhat ke mehman nazar aate hain
vo bagule jo sar-e-sehn-e-chaman uTThe hain
ab andheron se kaho ḳhair mana.en apni
zarre dharti ke miri ban ke kiran uTThe hain
jab bhi aaya hai kaḌa vaqt chaman par ‘mansha’
le ke ham hausla-e-fitna-shikan uTThe hain
Leave a Reply