suraj to de diya tha sitara bhi de diya
phir ham ne us ko ḳhaak ka ḳhirqa bhi de diya
aslan to shahr-e-ishq ke me.amar the magar
rab ne dayar-e-dard ka Theka bhi de diya
daman pakaḌ ke pichhe ye qallash thi paḌi
duniya ko ham ne bhiik ka kaasa bhi de diya
pagḌi dukan-e-sang-tarashi ki li magar
rokan men kar-ḳhana-e-shisha bhi de diya
tha hashr ko zamana-e-ma-qabl-e-hasti kam
so ham ne apni umr ka arsa bhi de diya
pahle ukhaḌi ḳhitta-e-dasht-e-junun ki baaḌ
phir sar-zamin-e-ḳhak ka qabza bhi de diya
us ki nazar thi haath pe so ham ne is liye
auzar de diye sabhi pesha bhi de diya
apni taraf se main ne ‘shafaq’ ḳhvab de diye
phir us ke ba.ad aankh ka surma bhi de diya
Leave a Reply