suraj huun chamakne ka bhi haq chahiye mujh ko
main kohr men lipTa huun shafaq chahiye mujh ko
ho jaa.e koi chiiz to mujh se bhi ibarat
likhne ke liye saada varaq chahiye mujh ko
ḳhanjar hai tu lahra ke mire dil men utar ja
hai aankh ki ḳhvahish ki shafaq chahiye mujh ko
ho vahm ki dastak ki kisi paanv ki aahaT
jiine ke liye kuchh to ramaq chahiye mujh ko
har baar miri raah men haa.il ho naya sang
har baar koi taaza sabaq chahiye mujh ko
jo kuchh bhi ho baaqi vo mire haath pe likh de
mazmun bahar-taur adaq chahiye mujh ko
jo zehn men tasvir hai kaghaz par utar aa.e
duniya men numa.ish ka bhi haq chahiye mujh ko
har phuul ke siine men gul-e-sang ho ‘sajid’
har sang men ik rang-e-qalaq chahiye mujh ko
Leave a Reply