Rahil Bukhari
suna hai chup ki bhi koi pukar hoti hai
ye bad-gumani mujhe baar baar hoti hai
ḳhayal-o-ḳhvab ki duniya sarab ki duniya
nazar faqir ki parde ke paar hoti hai
azab-e-dida koi rang sinchte kaise
ḳhizan-gazidgi ashufta-bar hoti hai
main apne hisse ke manzar ujalne se raha
ye agahi to bahut dil-figar hoti hai
umiid hi se zamane men shad-kami hai
yahi vo shaḳh hai jo saya-dar hoti hai
ye raat matami malbus hi men jachti thi
ye raat hi to hamen pursa-dar hoti hai
main ji raha huun to jiine ka hausla dekho
ye zaḳhm-koshi taghaful-shi.ar hoti hai
Leave a Reply