Tumhaare Eajaz-E-Husn Ki Mere Dil Pe Lakhon Inayaten Hain

tumhare eajaz-e-husn ki mere dil pe lakhon inayaten hain

tumhari hi den mere zauq-e-nazar ki saari latafaten hain

javan hai suraj jabin pe jis ke tumhare mathe ki raushni hai

sahar hasin hai ki us ke rukh par tumhare rukh ki sabahaten hain

main jin baharon ki parvarish kar raha huun zindan-e-gham men hamdam

kisi ke gesu-o-chashm-o-rukhsar-o-lab ki rangin hikayaten hain

na jaane chhalkae jaam kitne na jaane kitne subu uchhale

magar miri tishnagi ki ab bhi tiri nazar se shikayaten hain

main apni ankhon men sail-e-ashk-e-ravan nahin bijliyan liye huun

jo sar-buland aur ghayur hain ahl-e-gham ye un ki rivayaten hain

main raat ki god men sitare nahin sharare bikherta huun

sahar ke dil men jo apne ashkon se bo raha huun baghavaten hain

ye shairi-e-nau ki paighambari zamane ki davari hai

labon pe mere sahifa-e-inqilab ki surkh ayaten hain

Leave a Comment