Akhtar Saeed Khan
sun raha huun be-sada naghma jo main ba-chashm-e-tar
chupke chupke zindagi hansti hai mere haal par
apni saari umr kho kar main ne paaya hai tumhen
aao mere gham ke sannaTo mire nazdik-tar
ek dil tha so hua hai pa.emal-e-arzu
ab na koi rahnuma hai aur na koi ham-safar
har qadam par puchhta huun paanv ke chhalon se main
ye miri manzil hai ya baaqi hai meri rahguzar
kaun hai ye jo mire dil men hai ab tak mahv-e-ḳhvab
DhunDte hain ek muddat se jise sham-o-sahar
band hain varaftagan-e-husn par sab raste
tere dar se main agar uTThun to ja.unga kidhar
jal raha hai atish-e-furqat men lekin zinda hai
kyuun liye baiTha hai ye ilzam ‘aḳhtar’ apne sar
Leave a Reply