yuun to bahut hasin hai bahar-e-chaman ki yaad
dil par magar hai naqsh isi anjuman ki yaad
ham ḳhud gham-e-hayat se sina-figar hain
ai dosto dilao na us gul-badan ki yaad
is intha-e-talḳhi-e-dauran ke bavajud
taaza hai aaj bhi kisi shirin-dahan ki yaad
phir ji men hai ki kha.iye koi naya fareb
phir aa rahi hai ik but-e-va.ada-shikan ki yaad
rangin badalon ke ye TukḌe ye chandni
aksar dila ga.e hain tire bankpan ki yaad
uljhan gham-e-hayat ki kuchh aur baḌh ga.i
aa.i hai jab bhi zulf shikan-dar-shikan ki yaad
‘arshad’ dayar-e-ghair men sab kuchh luTa ke ham
dil se laga.e phirte hain apne vatan ki yaad
Leave a Reply