Afzal Naved
ham ne kuchh pankh jo dalan men rakh chhode hain
panchhi aa jaenge is dhyan men rakh chhode hain
sar-bulandi ho ki ai rahguzar-e-dil ham ne
saare jhagde hi tiri shaan men rakh chhode hain
aisa ashob-e-tavazun tha ki patthar saare
khench kar palla-e-mizan men rakh chhode hain
sochta huun ki vo iman hi le aae kabhi
rakhne kuchh aise bhi iman men rakh chhode hain
rakh liye rauzan-e-zindan pe parinde saare
jo na vaan rakhne the divan men rakh chhode hain
aise kuchh din bhi the jo ham se guzare na gae
vapsi ke kisi saman men rakh chhode hain
aaj ka din hai kisi bad-e-hina chalne ka din
aaj ke lamhe isi shaan men rakh chhode hain
Leave a Reply