suuli pe jaan aTki hai marta mariz huun
zaḳhmon se lutf leta anokha mariz huun
baten mohabbaton ki mire samne na kar
tu janta bhi hai ki main dil ka mariz huun
pagal kiya hai ishq ne aadha jo rah gaya
ab aadhe sar ke dard ka puura mariz huun
phir mera Thiik hone ko dil hi nahin kiya
us ne mujhe kaha tha main achchha mariz huun
vo ḳhush hai meri zahiri halat ko dekh kar
us ko ḳhabar nahin ki main kitna mariz huun
tum doston ke vaste be-shak baḌa sahi
us ki nazar men main abhi chhoTa mariz huun
bimar-e-karbala ke hai sadqe shifa mili
maula se ja ke puchhen main kaisa mariz huun
pahle bhi mere gaanv men ghayal hain tiin shaḳhs
azar agahi ka main chautha mariz huun
us ne ‘hasib’ mujh ko masiha samajh liya
main ne hazar baar kaha tha mariz huun
Leave a Reply