sulh-o-paikar bhi ho aur rifaqat bhi rahe
ḳhuun men ajdad ki thoḌi si sharafat bhi rahe
zehn-e-ḳhvabida ko masruf-e-amal rakhna hai
kya zaruri ki isharon men sarahat bhi rahe
ye to mumkin hai faqat gosha-e-tanha.i men
shor-e-bazar na ho aur qayamat bhi rahe
raushni ke liye darkar hai be-tabi-e-ḳhak
chand lekin hunar-e-shab se ibarat bhi rahe
sunte aa.e hain mohabbat hai ibadat ai dost
kabhi hans-bol ke baiTho to ibadat bhi rahe
sha.iri naghmagari sa.at-e-hairani men
taza-kari ho magar pas-e-rivayat bhi rahe
Leave a Reply