junun ke dam se aḳhir martaba kaisa mila mujh ko
abhi farhad-o-qais aa.e the kahne marhaba mujh ko
kisi surat bhi radd hota nahin ye faisla dil ka
nazar aata nahin koi bhi tujh sa dusra mujh ko
sar-e-kunj-e-tamanna phir ḳhushi se gunguna.unga
agar vo lauT kar aa.e to phir tum dekhna mujh ko
na jan-e-rashk se ghusse se gham se ya raqabat se
ye kis andaz se takta hai tera aa.ina mujh ko
khule to sab zamanon ke ḳhazane haath aa jaa.en
dar-e-iqlim-e-haft-alam hai vo band-e-qaba mujh ko
guman men bhi guman lagti hai ab to zindagi meri
nazar aata hai ab vo ḳhvab men bhi ḳhvab sa mujh ko
kasafat baar pa sakti nahin aisi latafat men
karam us ka ki baḳhsha dil ke badle aabla mujh ko
saba meri qadam-bosi se pahle gul na dekhegi
agar vahshat ne kuchh din baagh men rahne diya mujh ko
na nikli aaj gar koi yahan yakja.i ki surat
to kal se DhunDte phirna jahan men ja-ba-ja mujh ko
guzargah-e-nafas men huun misal-e-barg-e-avara
koi dam men uḌa le ja.egi bad-e-fana mujh ko
vo dil-avez ankhen vo lab-o-ruḳhsar vo zulfen
nahin ab dekhna kuchh bhi nahin us ke siva mujh ko
azal se ta-abad duniya se le kar asmanon tak
nazar aata hai teri hi nazar ka silsila mujh ko
mire hone se hi kuchh e’tibar us ka bhi qaa.em hai
junun tum se nimaT lega jo divana kaha mujh ko
koi ‘irfan’ mujh men se mujhe avaz deta hai
are tu sochta kya hai kabhi kuchh to bata mujh ko
Leave a Reply