vahan ab ja ke dekhen ham se kya irshad karte hain
qaza kahti hai chaliye aap ko vo yaad karte hain
janab-e-va.iz-o-pir-e-mughan kamil to hain donon
vo kuchh irshad karte hain ye kuchh irshad karte hain
pa.e tazim-e-dard uThta hai ai navak-fagan dil men
qadam-ranja jo tere navak-e-bedad karte hain
kabhi karte hain ham bada-parasti ja ke ka.abe men
kabhi aa kar haram se mai-kade abad karte hain
na chhoḌa saath mahshar tak hamara tu vo munis tha
gham-e-marhum tujh ko ḳhuld men ham yaad karte hain
vo hans kar ham se kahte hain paḌen is chaah par patthar
jo ham un se bayan-e-saḳhti-e-farhad karte hain
qafas se chhuT ke bhi ham qaid hain dam-e-mohabbat men
‘vasim’ azad kar ke bhi vo kab azad karte hain
Leave a Reply