Sufi
khudai mujh ko mil jaati khuda-e-do-jahan milta
jo tum milte to goya hasil-e-kaun-o-makan milta
ghulam-e-saqi-e-kausar huun mai ki kya kami mujh ko
na milta gar yahan saghar mira hissa vahan milta
ise kab koi pa sakta use kya dekhta koi
nazar se duur dil ki vusaton men jo nihan milta
unhen kab niind aai sunte sunte dil ka afsana
yahi tha vaqt jab un ko bhi lutf-e-dastan milta
jalati ek bijli kyun-kar itne ashiyanon ko
chaman ke patte patte par hamara ashiyan milta
hamare sajda-e-be-astan ka ye karishma tha
na hota astan jis ja vahan bhi astan milta
vahan do chaar sajde tum bhi kar lo ja ke ai ‘afqar’
pae sajda zamin se jis jagah hai asman milta
Leave a Reply