Nazron Se Noch Dali Sab Ne Qaba Gulon Ki

Nilofar Noor

nazron se noch Daali sab ne qaba gulon ki

lashen paḌi hui gulshan men pattiyon ki

rassi pe chal rahi hai nannhi si ek guḌiya

majburiyan hain shayad darpesh roTiyon ki

har koi chahta hai ghar ghar men chand utre

chahat nahin kisi ko angan men titliyon ki

aalam panah ka ab farman aa gaya hai

avaz tak na aa.e mahlon men muflison ki

lahje ko aur kitna nazuk bana ke bolen

ginti karen kahan tak mathe ki silvaTon ki

tum ‘nur’ ko na samjhe tum ‘nur’ ko na jaane

shaida hai andhiyon ki shauqin bijliyon ki