Maqsood Afaq
sukut toḌega ankhon ko aabju karega
jo kal adu ne kiya tha vo aaj tu karega
main haath rakhta huun sar par sada yatimon ke
yahi amal mujhe duniya men suraḳh-ru karega
ḳhud apne haath se apna vajud chaak kiya
yahi ummid ki tu aa.ega rafu karega
tavil arse ke ba.ad aaj ye ghaḌi aa.i
ki tera ishq mire dil se guftugu karega
kisi ke haq men dua kar ke dekhiye sahab
farishta aap ki sohbat ki aarzu karega
main us nigah ka mehvar nahin hua ab tak
vo mujh ko surat-e-ḳhashak ku-ba-ku karega
tiri hatheli ko dulhan koi bana na saka
ye kaam dekhna ab ke mira lahu karega
kisi ka hijr muassar hai is qadar ‘afaq’
ki chand baam pe aane ki justuju karega
Leave a Reply