Rehman Faris
sukut-e-sham men gunji sada udasi ki
ki hai mazid udasi dava udasi ki
bahut sharir tha main aur hansta phirta tha
phir ik faqir ne de di dua udasi ki
umur-e-dil men kisi tisre ka daḳhl nahin
yahan faqat tiri chalti hai ya udasi ki
charagh-e-dil ko zara ehtiyat se rakhna
ki aaj raat chalegi hava udasi ki
vo imtizaj tha aisa ki dang thi har aankh
jamal-e-yar ne pahni qaba udasi ki
isi umiid pe ankhen barasti rahti hain
ki ek din to sunega ḳhuda udasi ki
shajar ne puchha ki tujh men ye kis ki ḳhushbu hai
hava-e-sham-e-alam ne kaha udasi ki
dil-e-fasurda ko main ne to maar hi Daala
so main to Thiik huun ab tu suna udasi ki
zara sa chhu len to ghanTon dahakti rahti hai
hamen to maar ga.i ye ada udasi ki
bahut dinon se main us se nahin mila ‘faris’
kahin se ḳhair-ḳhabar le ke aa udasi ki
Leave a Reply