lagta hai zinda rahne ki hasrat ga.i nahin
mar ke bhi saans lene ki aadat ga.i nahin
shayad ki rach ga.i hai hamare ḳhamir men
sau baar sulh par bhi adavat ga.i nahin
aana paḌa palaT ke hudud o quyud men
chhoḌi bahut thi phir bhi sharafat ga.i nahin
rahti hai saath saath koi ḳhush-gavar yaad
tujh se bichhaḌ ke teri rifaqat ga.i nahin
baaqi hai reze reze men ik irtibat sa
yasir bikhar ke bhi miri vahdat ga.i nahin
Leave a Reply