Zeb Ghauri
rang-e-ghazal men dil ka lahu bhi shamil ho
ḳhanjar jaisa bhi ho lekin qatil ho
is tasvir ka aab o rang nahin badla
jaane kab ye dil ka naqsh bhi batil ho
shor-e-fughan par itni bechaini kaisi
tum se kya tum kaun kisi ke qatil ho
dekh kabhi aa kar ye la-mahdud faza
tu bhi meri tanha.i men shamil ho
main ki huun ek thaka-hara aur manda shaḳhs
meri ana kahti hai mere muqabil ho
‘zeb’ saval ab ye hai tujhe pahchane kaun
kis ki nazar is gahra.i ki hamil ho
Leave a Reply