sub.h tak main sochta huun shaam se
ji raha hai kaun mere naam se
shahr men sach bolta phirta huun main
log ḳha.if hain mire anjam se
raat bhar jagega chauki-dar ek
aur sab so ja.enge aram se
sau baras ka ho gaya mera mazar
ab navaza ja.un ga in.aam se
saath la.unga thakan be-kar ki
ghar se bahar ja raha huun kaam se
naam le us ka safar aghaz kar
duur rakh dil ko zara auham se
zindagi ki dauḌ men pichhe na tha
rah gaya vo sirf do ik gaam se
Leave a Reply