Subh Main Sau Kar uTha Khaya Piya Kal Ki Tarah

sub.h maiñ sau kar uThā khāyā piyā kal kī tarah

zindagī pyārī thī mujh ko jī liyā kal kī tarah

jo milā hans kar mile us se ḳhudā-hāfiz kahā

aaj bhī jaarī rahī mashq-e-riyā kal kī tarah

ham ne apne jī meñ Thānī aur ye kahte hue

jo na karnā thā vahī sab kar liyā kal kī tarah

aaj bhī kahte haiñ mujh ko log achchhā aadmī

aaj bhī ban kar rahā huuñ bahrūpiyā kal kī tarah

ḳhud se milne ke liye tanhā.ī kitnī chāhiye

aaj bhī paayā na maiñ ne taḳhliya kal kī tarah

piir ruumī aaj phir nikle haiñ kis kī khoj meñ

apne hāthoñ meñ liye jaltā diyā kal kī tarah

Leave a Comment