Sayed Mujeebul Hasan
kaali hava chali ga.i rang-e-ziyan uchhal ke
mere dayar men gulo rakhna qadam sanbhal ke
bad-e-sahar ḳhamosh thi jagti thiin sama.aten
mere labon pe raqs men harf the arz-e-hal ke
chashm dariche shauq ke band kiye ga.e sabhi
aur haTa diye ga.e parde dar-e-ḳhayal ke
mauj-e-shamim is liye chuum rahi hai gard-e-rah
vo bhi musafiron men hai qafila-e-jamal ke
aḳhiri had nahin hai duur ab na bahut kare ghurur
zulm ko de do ye ḳhabar aa ga.e din zaval ke
koi zamin ho koi bahr jaise nikalta huun main
koi dikha.e to mujhe sher na.e nikal ke
jaana jo chahta hai tu ku-e-yaqin ki taraf
raste pahle band kar kucha-e-ehtimal ke
ek saval se mire ho ga.e la-javab sab
koi javab deta kya ruḳh the ka.i saval ke
koi bhi naqsh-e-zindagi mujh se nihan na rah saka
meri nazar men hain ‘mujib’ aa.ine mah-o-sal ke
Leave a Reply